Xarici dil bilgisi insanlara daha perspektivli iş imkanları, digər ölkələri rahat gəzmək, dilləri əhatə edən ölkələrin mədəniyyətlərini, ədəbiyyatlarını, incəsənətlərini, habelə sosial-iqtisadi durumlarını və s. öyrənməyə yardımçı olur.
Bunların fonunda həmçinin vurğulayaq ki, Dövlət İmtahan Mərkəzindən gələn ildən şagirdlərin buraxılış imtahanında xarici dil fənnindən esse də yazacaqları bildirilib.
Təhsil sahəsi üzrə ekspert Elçin Əfəndi Zefer.media-ya açıqlaması zamanı deyib ki, dil öyrənmək üçün öncə çoxlu söz ehtiyatına yiyələnmək mütləqdir:
“Bunun üçün öncə hər gün neçə söz öyrənmək və bunu get-gedə artırmaq hədəfi qoyulmalıdır.
Dili daha da zəngin etmək üçün alt yazılı filmləri izləmək, xarici dillərdə musiqilər dinləmək effektivdir. Habelə öyrənmək istədiyiniz dildə yaxşı danışan bir şəxslə ünsiyyət qurmaq məsləhətli üsuldur”.
Ekspert o cümlədən əlavə edib ki, dövrümüzdə xarici dilləri mənimsəmək üçün əlimizdə kifayət qədər imkan var:
“Həm “chatgpt”, həm də digər süni zəka proqramları, eyni zamanda müvafiq hazırlıq kursları, bəzi tanınmış tətbiqlər mövcuddur.
Xarici dil öyrədilməsinə dövlətimiz də xüsusi diqqət və qayğı ilə yanaşır. DİM tərəfindən imtahanlarda dillərlə bağlı yeni qərarlar qəbul edilib: dinləyib və yaxud oxuyub anlama…
Növbəti ildən artıq esse əsasında da xarici dil fənn blokuna daxil olur. Ən azı yüz sözdən ibarət esse yazılmalı və qiymətləndirməsi aparılmalıdır”.
Zərintac Mayisqızı
