Çörəyin yaxşı olub-olmaması unun keyfiyyəti məsələsini önə çıxarır. Zaman-zaman insanlardan eşidirik ki, satılan bəzi çörəklərin dadı qəribədir, tərkibi də sağlamlığa ziyan ola bilir. Burda unun hazırlaşma qaydası ön plana çıxır.
Qida eksperti Fərid Səfərov Zefer.media-ya açıqlamasında deyib ki, “çörək yaxşı deyil” fikri çox vaxt istifadə olunan unun keyfiyyəti və istehsal prosesi ilə bağlı olur:
1. Keyfiyyətsiz undan hazırlanan çörək necə olur?
Belə çörəklərdə adətən bu əlamətlər görünür:
– İçi yapışqan və ya çox sıx olur (yaxşı bişməyib və ya un zəifdir).
– Həddindən artıq tez bayatlayır.
– Dadında turşuluq və ya acılıq hiss edilə bilər.
– Üzəri çox solğun və ya həddindən artıq sərt olur.
– Kəsdikdə struktur qeyri-bərabər görünür.
Bu hallar ya unun keyfiyyətsiz olması, ya da texnologiyaya düzgün əməl olunmaması ilə bağlıdır.
2. Keyfiyyətli un necə olur?
Keyfiyyətli unu belə tanımaq olar:
– Rəngi təmiz və təbii olur (çox ağ olması bəzən həddindən artıq emala işarədir).
– Qoxusu neytral və xoşdur (turş və ya kif iyi olmamalıdır).
– Əl ilə sıxdıqda topalanmır, yüngül və axıcı olur”.
Qida eksperti çörək alarkən diqqət edilməli olan amilləri də sadalayıb:
“- Üzəri qızılı-qəhvəyi olmalıdır (çox ağ və ya yanıq olmamalıdır).
– İçi yumşaq, elastik və bərabər məsaməli olmalıdır.
– Təzə çörək iyi gəlməlidir, kəskin turş qoxu olmamalıdır.
– Eyni ölçüdə çörəklərdən çox yüngül olanlar keyfiyyətsiz ola bilər.
– Etiket (əgər qablaşdırılıbsa): Tərkibi oxuyun – çox sayda qatqı maddəsi varsa, bu artıq sənaye müdaxiləsinin çox olduğunu göstərir
Hazırlanma şəraiti də önəmlidir. Keyfiyyətli çörək üçün vacib amillər:
– Təbii maya (xüsusilə turş maya) istifadə olunması.
– Uzun fermentasiya müddəti (həzm üçün daha faydalıdır).
– Yüksək keyfiyyətli buğda unu.
– Gigiyenik və düzgün temperaturda bişirilmə (daş soba üstünlükdür).
Yaxşı çörək yalnız undan asılı deyil – un, maya, texnologiya, bişirmə şəraiti birlikdə nəticəni müəyyən edir. Sağlam qidalanaraq sağlam yaşayın”.
Zərintac Mayisqızı
