Rusiya Prezidenti Vladimir Putin və ABŞ Prezidenti Donald Tramp arasında telefon danışığı baş tutub.
Zefer.media xəbər verir ki, bu barədə Rusiya prezidentinin beynəlxalq məsələlər üzrə köməkçisi Yuri Uşakov məlumat verib.
Onun sözlərinə görə, telefon danışığı Trampın təşəbbüsü ilə baş tutub.
“Tramp cari məsələləri, ilk növbədə İran ətrafındakı vəziyyəti və Ukrayna münaqişəsinin həlli məsələsini müzakirə etmək üçün Putinə zəng edib. Söhbət həmişəki kimi konstruktiv keçib və təxminən bir saat davam edib”, – deyə Kreml rəsmisi bildirib.
Uşakov Putinin Trampla 2025-ci ilin dekabr ayından bəri ilk dəfə telefonda danışdığını xatırladıb.
O əlavə edib ki, Vladimir Putin və Donald Tramp İranla müharibəni və Ukrayna ilə bağlı üçtərəfli danışıqları müzakirə ediblər.
Uşakov qeyd edib ki, Putin İran münaqişəsinin həlli ilə bağlı fikirlərini, o cümlədən Körfəz liderləri ilə danışıqlarının nəticələrini Trampa bildirib.
Kreml rəsmisi Trampla söhbətində Putinin xüsusi hərbi əməliyyat zamanı Rusiya qoşunlarının uğurlu irəliləyişini qeyd etdiyini və bunun Kiyevi danışıqlara təşviq etməli olduğunu söyləyib:
“Rusiya lideri həmçinin ABŞ-ın və şəxsən Trampın vasitəçilik səylərini yüksək qiymətləndirib. Tramp Ukrayna münaqişəsinin tez və uzunmüddətli həllində maraqlı olduğunu bir daha vurğulayıb”
Uşakov Putin və Trampın neft bazarındakı vəziyyəti müzakirə etdiklərini də bildirib.
