Türkiyə Prezident Administrasiyasının Müdafiə Sənayesi Komitəsinin sədri Haluk Görgün bildirib ki, dövlətin 2023-cü il fevralın 6-da baş vermiş zəlzələ fəlakətindən sonra həyata keçirdiyi dünya miqyasında nümunə sayılan yenidənqurma prosesinin bir hissəsi kimi, Türkiyə müdafiə sənayesi də bölgənin iqtisadi və texnoloji inkişafına töhfə verən investisiyalarla bu böyük səfərbərliyə dəstək verib.
Zefer.media xəbər verir ki, bu barədə Türkiyə KİV-ləri məlumat yayıb.
Görgün sosial şəbəkə hesabındakı paylaşımında 2023-cü il fevralın 6-da baş verən zəlzələ fəlakətində həyatını itirən vətəndaşları rəhmətlə yad etdiyini bildirərək qeyd edib: “Geridə qalanlara səbir və dözüm arzulayıram. Allah millətimizi hər cür fəlakətdən qorusun, həmrəyliyimizi gücləndirsin”.
Dövlətin zəlzələdən sonra həyata keçirdiyi dünya miqyasında nümunə sayılan yenidənqurma prosesinin bir hissəsi kimi, Türkiyə müdafiə sənayesinin də bölgənin iqtisadi və texnoloji inkişafına töhfə verən investisiyalarla bu böyük səfərbərliyə dəstək verdiyini bildirən Görgün bunları qeyd edib:
“Bunu möhkəm iradə və güclü birlik sayəsində birlikdə bacardıq. Müdafiə sənayesi investisiyalarımız çərçivəsində Adıyamanda ASELSAN, TUSAŞ, ROKETSAN və HAVELSAN-ın öncüllüyü ilə kabel istehsalı müəssisəsi, Kahramanmaraşda TUSAŞ Aviasiya Arxitekturaları İstehsal Müəssisəsi, Kahramanmaraşda Aviasiya Arxitekturaları Peşə Ali Məktəbi, Hatayın Kırıkhan rayonunda ROKETSAN-ın strateji istehsal müəssisəsi, Malatyada ASELSAN Təmir, Bərpa və Elektron Kart İstehsalı Müəssisəsi, Qaziantepdə ASELSAN və sənayeçilərlə birgə texnologiya investisiyası, müdafiə sənayesi yönəlmiş yeni məşğulluq və ixtisaslı kadr layihələri həyata keçirilir”.
Görgün bildirib ki, bu investisiyalar yalnız istehsal deyil, gənclər üçün iş, qazanc və gələcək deməkdir. O qeyd edib: “Müdafiə sənayesi Türkiyənin iqtisadi dirçəlişinin və regional həmrəyliyinin də güclü iştirakçısıdır. Bu böyük səfərbərlikdə Prezidentimiz Rəcəb Tayyib Ərdoğanın uzaqgörən liderliyinə, bütün qurumlarımıza, mühəndislərimizə, işçilərimizə və bu milli səfərbərliyə zəhmət verən hər kəsə ürəkdən təşəkkür edirəm”. (ordu.az)
