Regionda davam edən hərbi toqquşmalar və təhlükəsizlik riskləri fonunda Azərbaycanın müdafiə qabiliyyətinin gücləndirilməsi məsələsi yenidən gündəmə gəlib. Xüsusilə, ölkənin cənub və şimal sərhədləri yaxınlığında müşahidə olunan münaqişələr ordunun modernləşdirilməsi və yeni silah sistemləri ilə təminatın əhəmiyyətini artırır.
Mövzuyla bağlı Zefer.media-ya açıqlama verən hərbi ekspert Ədalət Verdiyev Azərbaycanın cənub və şimal istiqamətlərinə yaxın bölgələrdə ağır silahların tətbiq olunduğu hərbi qarşıdurmaların yaşandığını qeyd edib:
“Azərbaycanın cənub və şimal sərhədləri yaxınlığında raket, artilleriya, aviasiya və pilotsuz uçuş aparatlarının zərbələri ilə müşayiət olunan qanlı müharibələr davam edir. Təbii ki, bu müharibələrin Azərbaycan üçün müəyyən təhdidlər yaratdığı məlumdur. Azərbaycan isə bu təhlükələrin qarşısını almaq üçün zəruri olan silah sistemlərinin əldə olunmasını davam etdirir.
Ordunun təminatı və təchizatı üçün vacib hesab edilən bütün avadanlıq, vasitə və texnika Silahlı Qüvvələrin silahlanmasına qəbul edilir. Azərbaycan Silahlı Qüvvələrinin əsas inkişaf istiqamətlərinə isə, ilk növbədə, hava hücumundan müdafiə sistemlərinin, Hərbi Hava Qüvvələrinin və Hərbi Dəniz Qüvvələrinin gücləndirilməsi daxildir”.
Ə.Verdiyev quru qoşunlarında türk hərbi modelinə uyğunlaşma prosesinin artıq son mərhələyə çatdığını bildirib:
“Quru qoşunlarında türk ordu modelinə keçid prosesi artıq yekunlaşmaq üzrədir. Dövlətimiz ölkəmizə qarşı yönələ biləcək istənilən təhdid və təhlükənin qarşısını almaq məqsədilə ordunun və Silahlı Qüvvələrin təminat və təchizatının bundan sonra da ən yüksək səviyyədə saxlanılması üçün zəruri addımlar atmağı davam etdirəcək”.
Pərvin
