Rusiya həmişə bütün konstruktiv milli siyasi qüvvələrlə dialoqu genişləndirməyə çalışır.
Zefer.media xəbər verir ki, bunu Rusiya prezidenti Vladimir Putin aprelin 27-də Beynəlxalq Sosialist Şəbəkəsinin (Sovintern) forumunda oxunan salamlama teleqramında bildirib.
Teleqramda deyilir: “Rusiya həmişə bütün konstruktiv milli siyasi qüvvələr arasında səmərəli dialoqu genişləndirməyə çalışıb. Şanxay Əməkdaşlıq Təşkilatı, BRICS və Avrasiya İqtisadi Birliyindəki həmkarlarımızla birlikdə qanunvericilik və partiya strukturları arasında tərəfdaşlıq üçün real mexanizmlər yaradırıq”.
Onun sözlərinə görə, bu cür qarşılıqlı fəaliyyət qlobal və regional sabitliyə, eləcə də iqtisadi və sosial inkişafa qarşı çağırışların həlli yollarını tapmaq üçün səyləri birləşdirmək məqsədi daşıyır. Dövlət başçısı ümid edir ki, partiyalararası əməkdaşlığın yeni formatı çoxtərəfli əlaqələrin dərinləşməsinə və ölkələr və xalqlar arasında etimadı gücləndirməyə kömək edəcək.
Putin həmçinin qeyd edib ki, Moskva forumu Rusiya və xarici partiyaların, hərəkatların və ictimai təşkilatların nümayəndələrini bir araya gətirib. Rusiya lideri görüş iştirakçılarının sosial ədalət, suveren inkişaf və ənənəvi mənəvi-əxlaqi dəyərləri müdafiə etdiyini vurğulayıb.
Zərintac Mayisqızı
