Bu gün Naxçıvan istiqamətində qeydə alınan hücum cəmiyyətdə və ictimai müzakirələrdə ciddi narahatlıq doğurub. Hadisənin başvermə səbəbləri, mümkün nəticələri və bölgədəki ümumi vəziyyətin necə dəyişə biləcəyi diqqət mərkəzindədir. Mövzu ilə bağlı yaranan suallar və mövcud vəziyyət ətrafında müzakirələr davam edir.
Baş verənlərlə bağlı Zefer.media-ya açıqlama verən hərbi ekspert Ədalət Verdiyev molla rejiminin siyasi nüfuzunun zəiflədiyinin artıq geniş şəkildə qəbul olunan bir reallıq olduğunu qeyd edib:
“Şərəf və ləyaqətdən məhrum olan xain molla rejiminin son günlərini yaşadığı artıq heç kim üçün sirr deyil. Belə bir vəziyyətdə İranın Ermənistanla sərhəddə, öz sərhədlərinin yaxınlığında yerləşən Amerika hərbi bazasına və həmin ərazidə İran istiqamətində kəşfiyyat aparmaq üçün qurulan ABŞ radiolokasiya stansiyalarına münasibət bildirməməsi diqqət çəkir.
Buna baxmayaraq, İran ABŞ-la münaqişədə tərəf olmayan və öz ərazisinin İrana qarşı istifadə edilməsinə heç vaxt icazə verməyən Azərbaycanın ərazisini hədəfə alaraq Naxçıvan hava limanına və azyaşlı şagirdlərin təhsil aldığı məktəbə hava zərbələri endirib. Bu hücumun əsas məqsədi Azərbaycan ilə Naxçıvan arasında əlaqəni pozmaq, ikinci məqsədi isə münaqişə zonasını genişləndirməkdir.
Azərbaycan ərazilərinə endirilən hava zərbələrinin bir sıra ölkələr tərəfindən terror təşkilatı kimi tanınan SEPAH tərəfindən həyata keçirildiyi bildirilir. Ermənistan Xarici İşlər Nazirliyi isə bu iddiaları təkzib edir. Bununla belə, SEPAH hücum zamanı istifadə edilən dronun markasını belə açıq şəkildə bəyan edib.
Bu xain hücuma görə İran Azərbaycandan üzr istəməlidir. Əks halda Azərbaycan üzv olduğu Türk Dövlətləri Təşkilatı, Şuşa Bəyannaməsini imzaladığı Türkiyə, Bakı Bəyannaməsini imzaladığı Pakistan və digər dost və müttəfiq ölkələrlə razılaşdırılmış, uzlaşdırılmış və İranın fəaliyyətlərinə adekvat addımlar atacaq. Heç bir vətəndaşımızın qanı yerdə qalmayacaq. Bu günə qədər bütün əsgər və mülki vətəndaşlarımızın qisası düşmənlərdən artıqlaması ilə alınıb. Ali Baş Komandanın rəhbərliyi ilə bu xain hücumun müəllifləri də törətdikləri cinayətə görə mütləq cavab verəcəklər”.
Ə.Verdiyev hadisənin mülki şəxslərə və azyaşlı uşaqlara qarşı həyata keçirilmiş ağır və qəbuledilməz hücum kimi dəyərləndirildiyini vurğulayıb:
“Baş verən hadisə mülki insanlara və azyaşlı uşaqlara qarşı molla rejimi tərəfindən həyata keçirilmiş nankor və xain bir hücum kimi qiymətləndirilir”.
Pərvin
