İranda davam edən genişmiqyaslı internet kəsintiləri ölkəni dünya informasiya məkanından tamamilə qoparmaq həddinə çatdırıb.
Bu barədə Zefer.media xarici KİV-ə istinadən xəbər verir. Qlobal internet monitorinqi ilə məşğul olan “NetBlocks” təşkilatının son hesabatına görə, ölkədə şəbəkəyə çıxışın məhdudlaşdırılması artıq 23-cü gündür ki, fasiləsiz davam edir və ümumi təcrid müddəti 528 saatı ötüb. Təşkilat bu vəziyyəti indiyədək qeydə alınan ən ciddi və uzunmüddətli ölkə miqyaslı internet blokadası kimi qiymətləndirir.
Məlumata görə, dördüncü həftəsinə daxil olan bu “rəqəmsal qaranlıq” xüsusilə ABŞ və İsrailin hərbi zərbələri fonunda tətbiq edilib ki, bu da milyonlarla mülki şəxsin müstəqil xəbər mənbələrinə və təhlükəsizlik xəbərdarlıqlarına çıxışını tamamilə bağlayıb.
Beynəlxalq müşahidəçilər qeyd edirlər ki, informasiya axınının bu dərəcədə məhdudlaşdırılması həm ölkə daxilindəki humanitar vəziyyəti ağırlaşdırır, həm də dünyanı İranda baş verən real hadisələrdən xəbərsiz qoyur.
