Yuxu iflici, insanın beyni oyandığı halda bədənin müvəqqəti hərəkətsiz qalması ilə xarakterizə olunan yuxu pozuntusudur. Bu hal adətən anksiyete meyilli şəxslərdə, yuxu rejimi pozulan insanlarda və narkolepsiya kimi vəziyyətlərdə daha çox müşahidə olunur. Qısa müddətli olsa da, yuxu iflici zamanı ortaya çıxan həyəcan və qorxu hissi insanların gündəlik həyatına təsir göstərə bilər.
Məsələ ilə bağlı Zefer.media-ya açıqlama verən nevroloq, nevtopatoloq Sevinc Məmmədova yuxu iflicinin bədənin müvəqqəti hərəkətsiz qalması ilə müşahidə olunan yuxu problemi olduğunu qeyd edib:
“Yuxu iflici, yuxu pozuntusunun bir forması kimi ortaya çıxır. Nevroloji praktikada biz bu hal ilə mütəmadi olaraq qarşılaşırıq və əsasən müəyyən qruplarda daha çox rast gəlinir. Bunlar arasında anksiyete meyilli şəxslər, yuxu rejimi pozulmuş insanlar, narkolepsiyası olan şəxslər – yəni gündüz aşırı yuxululuq yaşayan, kofein və spirtli içkilərdən çox istifadə edən, həmçinin kompüter və planşet qarşısında uzun müddət oturan insanlar yer alır.
Yuxu iflici zamanı beyin oyandığı halda, bədən müvəqqəti iflic vəziyyətinə düşür və insan öz hərəkətlərini idarə edə bilmir, nəticədə tam ayıla bilmir. Bu vəziyyət bir neçə saniyədən bir dəqiqəyə qədər davam edə bilər və şəxsdə müəyyən həyəcan və qorxu hissi yarada bilər”.
Nevroloq, yuxu iflicini önləmək üçün gündəlik yuxu nizamına riayət etməyin önəmli olduğunu bildirib:
“Bu halın qarşısını almaq üçün gündəlik həyatımızda yuxu rejiminə diqqət yetirmək vacibdir. Gündüz saatlarında təmiz havada olmaq, fiziki məşqlərlə məşğul olmaq, eyni zamanda gecə yuxusunu 7–9 saat arası normal şəkildə almaq, yuxu gigiyenasına riayət etmək – məsələn, yuxu zamanı planşetlərin, telefon və digər elektron cihazların istifadəsini minimuma endirmək tövsiyə olunur”.
Pərvin Hacıyeva
