Dünən İslamabadda Pakistanın vasitəçiliyi ilə İran və ABŞ arasında danışıqlar baş tutub. Lakin yekunda heç bir razılaşma əldə olunmadan başa çatıb.
Politoloq Turan Rzayev Zefer.media-ya açıqlamasında deyib ki, əslində həmin danışıqların nəticəsiz olması təəcüblü deyil:
“Tərəflər arasında döyüşlər gedirdi, ciddi təlimatlar verildi. İran tərəfi də çox böyük itkilərə məruz qaldı. Eyni qaydada son iki həftə ərzində İran tərəfi də Amerikaya ciddi zərbələr endirdi. İndiki məqamda yeganə ümidverici və pozitiv məqam onların araya gəlməsidir. Belə savaşlardan sonra danışıqlara özü bir uğurdur. İlk turdan nəyinsə qazanılması məntiqsiz idi, üstəlik görüşdən öncə ürəkaçan mesajlar da verilmirdi. Hər kəs özünü qalib sayırdı”.
Turan Rzayev vurğulayıb ki, hələ qarşıda bir neçə turlu danışıqlar həyata keçiriləcək:
“Amerika və İran arasında danışıqlar ilk dəfə deyil. Müharibə öncəsi də Cenevrədə danışıqlar oldu, lakin müharibənin davam etdiyini gördük. Görünür, atəşkəs də uzun çəkməyəcək.
Rəsmi Vaşinqton bunun fərqindədir ki, müharibənin uzanması indiki məqamda Çinə sərf edir. ABŞ Rusiyanı Ukraynanın bataqlığına çəkərək müharibədə tükəndirmə taktikasına getdi, indi də eyni qaydada əslində Çin İranı dəstəkləyir. Tehranı dəstəklədiyi üçün də İran tərəfdən müharibədə müəyyən qədər balans təmin edə bilib. Beləliklə, Ağ Ev öz resurslarını tükədir. Amerika da yəqin prosesin çox uzanmasını istəmir. Ancaq digər tərəfdən ABŞ-nin qorumalı olduğu bir prestij də var və ona görə müharibəni davam etdirməlidir. Əslində bir növ Rusiyanın içərisində olduğu bir situasiyaya doğru gedilir. Lakin bu Amerikadır. Tramp administrasiyasının nələr edəcəyini öncədən təxmin etmək çətin olur. Sonrakı danışıqlarda bəzi nəticələr də əldə edilə bilər. Təbii ki, tərəflərin nə istədiyini bəlli etməsi, kompromisə gedə bilməsi və savaşdan çəkilməsindən asılı olacaq. Döyüşlərin davam etdiyi təqdirdə danışıqlar nəticəsiz qalacaq”.
