“Gömrükdən keçdiyi gündən 6 ay müddətində rəsmiləşdirilməmiş nəqliyyat vasitələrinin dövlət mülkiyyətinə keçməsi ilə bağlı Gömrük Məcəlləsinə edilən dəyişikliyin avtomobil bazarına təsir etməyəcəyini düşünürəm.
Zefer.media-ya xəbər verir ki, bu sözləri İqtisadiyyat.az-a açıqlamasında nəqliyyat məsələləri üzrə ekspert Eldəniz Cəfərov deyib.
Onun sözlərinə görə, avtomobili ölkəyə gətirən şəxs onu altı ay ərzində öz adına rahat şəkildə rəsimləşdirə bilər:
“Bu, az müddət deyil. Nəzərə almalıyıq ki, bu qayda təkcə avtomobillərə görə deyil, digər mal və məhsullara da şamil ediləcək. Bu baxımdan hesab edirəm ki, yeni qaydanın avtomobil bazarına, alqı-satqısına təsiri olmayacaq. Əvvəllər bu qayda yox idi deyə, insanlar gətirdikləri mal və məhsulları rəsimləşdirməyə tələsmirdilər. Mallar da uzun müddət anbarda qalırdı. Faktiki olaraq insanlar dövlətin anbarını öz şəxsi mülkləri kimi istifadə və məşğul edirdilər. Bu isə belə olmamalıdır. Altı ayın özü də kifayət qədər böyük müddətdir. Sən altı ay ərzində gətirdiyin məhsulu rəsmiləşdirmirsənsə, buna dövlət nə etməlidir?! Yəni bu qayda təkcə avtomobillərlə bağlı olmadığı üçün avtomobil bazarına da ciddi təsir göstərməyəcək”.
Qeyd edək ki, Gömrük Məcəlləsinə edilən dəyişikliyə əsasən, gömrük sərhədini keçdiyi gündən 6 ay müddətində rəsmiləşdirilməmiş və ya rəsmiləşdirilməsi başa çatmamış mallar və nəqliyyat vasitələri dövlət mülkiyyətinə keçiriləcək. Təklif edilən dəyişikliklər Milli Məclisin plenar iclasında müzakirə edilərək birinci oxunuşda qəbul edilib.
