4–5 may tarixlərində Elnur Məmmədov-un rəhbərlik etdiyi nümayəndə heyətinin Ekvador səfəri çərçivəsində Quito şəhərində iki ölkə arasında ilk siyasi məsləhətləşmələr baş tutub. Görüşlər zamanı siyasi, iqtisadi və humanitar sahələrdə əməkdaşlığın mövcud vəziyyəti və gələcək inkişaf perspektivləri müzakirə olunub, həmçinin diplomatik pasport sahibləri üçün viza rejiminin ləğvini nəzərdə tutan saziş imzalanıb.
Bütün bunlarla bağlı Zefer.media-ya açıqlamasında politoloq Əli Mustafa bildirib ki, Azərbaycan və Ekvador arasında əməkdaşlıq yeni mərhələyə qədəm qoyur:
“Ekvador 1992-ci ildə Azərbaycanı tanıyıb, 2004-cü ildən isə iki ölkə arasında diplomatik münasibətlər qurulub. Hazırda tərəflər siyasi, iqtisadi və humanitar sahələrdə əməkdaşlığın inkişafını müzakirə edirlər ki, bu da tamamilə təbii prosesdir. Ümumiyyətlə, Azərbaycan gənc dövlət kimi beynəlxalq hüququn digər subyektləri ilə əlaqələrini nə qədər genişləndirərsə, onun suverenliyi bir o qədər möhkəmlənər. Eyni zamanda, görünür ki, Ekvador üçün də Azərbaycanla əməkdaşlıq əhəmiyyətlidir. Viza rejiminin ləğvi məsələsinə gəldikdə isə, bu daha çox diplomatik pasport sahiblərinə aiddir. Yüksək vəzifəli şəxslər viza almadan qarşılıqlı səfərlər edə bilirlər. Sözügedən addım onların gediş-gəliş prosedurlarını sadələşdirir və bürokratik maneələri aradan qaldırır. Ümumilikdə, belə razılaşmalar bir çox ölkələr arasında mövcuddur və diplomatik pasport sahiblərinin sərbəst hərəkətini təmin etməklə əməkdaşlığın inkişafına müsbət təsir göstərir”.
Qəmər Kazımzadə
