Davamlı oturaq həyat tərzi insanı hərəkətsizləşdirir, üstəlik bu müxtəlif xəstəliklərin çarçısıdır. Ofis işlərində kompüter qarşısında oturanlar işdən sonra ya da işdən əvvəl maksimum yeriməyə üstünlük verməlidirlər. Əks təqdirdə səhhətlərində müxtəlif problemlərin şahidi olacaqlar.
Zefer.media araşdırmalara əsasən xəbər verir ki, xüsusilə də köklükdən əziyyət çəkənlər ən azı 30 dəqiqə yerisinlər və artıq çəkidən xilas olsunlar.
Belə demək mümkünsə əksər şəxslərin idman etməyə ya vaxtı olmur, ya da həvəsi. Onda ən gözəl çarə piyada gəzməkdir, xüsusilə təmiz havada… Amma imkan varsa əlbəttə ki, idmana diqqət yetirmək çox vacibdir. Elə gəzinti də idmandan ayrı deyil.
Sürətli və cəld gəzinti əzələləri möhkəmləndirir, bədən quruluşunu normal saxlayır. Piyada yerimək ürək-damar sistemi üçün olduqca faydalıdır. Gəzinti zamanı qan dövranı yaxşılaşır, beyin və digər orqanlar oksigenlə daha yaxşı təchiz olunur, təmiz havada yerimək əhvalın xoş olması, stress və gərginliyin aradan qaldırılması üçün əvəzsiz vasitədir.
Gündəlik gəzinti, həmçinin insanı cavan və gümrah saxlayır, tənəffüs yollarını açır, həzm sisteminin fəaliyyətini yaxşılaşdırır, görmə qabiliyyətinə müsbət təsir göstərir. Hər gün bir neçə saat yerimək orqanizmin immun sistemini gücləndirir, müqaviməti artırır və bu da xəstəliklərə qarşı mübarizədə ən səmərəli vasitələrdən biri sayılır. Axşam gəzintisi isə yuxu rejimini qaydaya salır.
Zərintac Mayisqızı
