Azərbaycanda bank sektorunda son dövrlər müəyyən dəyişikliklər baş verir. Son olaraq bir bank fəaliyyətini dayandıraraq bank olmayan kredit təşkilatına (BOKT) çevrildi və bununla da ölkədə fəaliyyət göstərən bankların sayı 21-ə düşdü. Eyni zamanda Məkrəzi Bank tərəfindən açıqlanan şikayət statistikasında bəzi bankların ön sıralarda yer alması sektorda mövcud problemləri bir daha gündəmə gətirib.
Qeyd edək ki, Azərbaycanda daha iki bankın fəaliyyətini dayandıracağı barədə fikirlər səsləndirilir. Maraqlıdır, belə olan halda həmin banklara kredit borcu olan vətəndaşların öhdəlikləri ləğv olunur?
Mövzuyla bağlı Zefer.media-ya açıqlama verən iqtisadçı Fuad İbrahimov bankın bağlanmasının kredit borcunun ləğv olunması anlamına gəlmədiyini qeyd edib:
“Bankın bağlanması kredit borcu olan şəxslərin öhdəliklərdən azad edilməsi demək deyil. Yəni bank bağlanıb deyə vətəndaşın krediti ödəməməsi və ya bu borcun qüvvədən düşməsi kimi bir hal yarana bilməz.
Belə hallarda Azərbaycan Respublikasının Mərkəzi Bankı tərəfindən müvafiq səlahiyyətlər müvəqqəti olaraq başqa banka ötürülə bilər. Bəzi hallarda isə bankın bütün kredit portfeli, müştəri bazası və depozit müqavilələrinin icrası ilə bağlı öhdəliklər də daxil olmaqla, ümumi fəaliyyət göstəriciləri digər banka həvalə oluna bilər”.
İqtisadçı bank bağlanan halda kredit borclarının və əməliyyat tarixçəsinin digər banka ötürüldüyünü, vətəndaşların isə ödənişləri həmin bank vasitəsilə davam etdirdiklərini qeyd edib:
“Bu zaman kredit borcları və onlara dair əməliyyat tarixçəsi də yeni banka ötürülür və vətəndaşlar kredit ödənişlərini həmin bank vasitəsilə davam etdirirlər. Yəni heç kim müştəriyə “bank bağlanıb, dərhal gəlib krediti bağla” kimi bir tələb irəli sürmür.
Eyni zamanda vətəndaşa bank bağlandığı üçün kredit öhdəliyindən azad olmaq səlahiyyəti də verilmir. Başqa sözlə, bankın fəaliyyətini dayandırması borcun ləğv olunması anlamına gəlmir.
Nəticə etibarilə, həmin səlahiyyətlər müvəqqəti və ya daimi əsasda başqa bir banka ötürülə bilər və kredit ödənişləri həmin bank vasitəsilə davam etdirilir. Mexanizm əsas etibarilə bu şəkildə həyata keçirilir”.
Pərvin
