Son illər müharibə iştirakçılarının sosial təminatı və dövlət tərəfindən göstərilən maddi dəstək məsələləri cəmiyyətin diqqət mərkəzində qalmaqdadır. Xüsusilə, artan yaşayış xərcləri fonunda bu kateqoriyaya aid şəxslərin rifah səviyyəsinin qorunması və yaxşılaşdırılması mövzusu müxtəlif platformalarda müzakirə edilir. Mövcud mexanizmlərin yetərliliyi və gələcəkdə hansı addımların atıla biləcəyi ilə bağlı suallar aktuallığını saxlayır.
Məsələ ilə bağlı Zefer.media-ya açıqlama verən millət vəkili Vüqar Bayramov veteran və qazilərin sosial müdafiəsinin dövlət siyasətində əsas istiqamətlərdən biri olunuduğunu vurğulayıb:
“Ümumiyyətlə, veteranlara və qazilərə dövlət dəstəyi prioritet istiqamətlərdən biridir, əvvəlki illərdə də bu sahədə dəstəyin göstərilməsi və sosial paketlərin həyata keçirilməsi müşahidə olunub. Qanunvericilik də müvafiq istiqamətdə təkmilləşdirilir.
Xüsusilə, müharibə əlillərinə ödənilən müavinətin məbləği ilə bağlı təkliflərimiz mütəmadi şəkildə təqdim edilir. Yanaşmamız ondan ibarətdir ki, həmin müavinətin kommunal, nəqliyyat və digər xərclərlə əlaqələndirilməsi daha məqsədəuyğun olardı. Belə ki, qeyd olunan xərclərdə artım baş verdiyi halda, müavinətin məbləğinin də artırılması mümkün olar. Bu isə müavinət məbləğinə dövri qaydada baxılması və onun artırılması ilə nəticələnə bilər”.
Sonda V.Bayramov müavinətlərin artırılması ilə bağlı qərarların mövcud maliyyə imkanları çərçivəsində qəbul olunduğunu qeyd edib:
“Şübhəsiz, hər hansı müavinətin artırılması ilə bağlı qərarlar fiskal imkanlar nəzərə alınmaqla qəbul edilir. Bu istiqamətdə təkliflər irəli sürülür, maliyyə qiymətləndirilməsi aparılır və xüsusilə mövcud maliyyə resursları çərçivəsində qərarların verilməsi təmin olunur. Eyni zamanda yeni mexanizmin hazırlanması və həmin mexanizm çərçivəsində müavinət məbləğinə mütəmadi olaraq yenidən baxılması təklif edilir”.
Pərvin
