Xocalı faciəsi xalqımızın qəlbinə elə bir dağ basıb ki, 44 günlük Vətən müharibəsində qazandığımız şanlı Zəfər, antiterror əməliyyatları zamanı Xocalı qatillərinin ədalət qarşısına çıxarılması, eləcə də vətəndaşlarımızın doğma yurdlarına qayıdışı kimi qürurverici və tarixi hadisələr belə həmin ağrını tam unutdurmur. Bu qürur dolu zəfərlər şəhidlərimizin qanının yerdə qalmadığını göstərsə də, Xocalının yarası hər zaman qəlbimizdə yaşayır.
Fevralın 25-dən 26-na keçən gecə erməni silahlı birləşmələri tərəfindən törədilən bu dəhşətli faciə təkcə Xocalı sakinlərini deyil, bütövlükdə bütün xalqımızı sarsıtdı. Uşaq, qadın, qoca demədən yüzlərlə günahsız insan amansızcasına qətlə yetirildi, ailələr məhv edildi, insanlar öz doğma torpaqlarından didərgin salındı. Bu, insanlığa qarşı törədilmiş ən ağır cinayətlərdən biri kimi tarixə yazıldı.
İllər keçsə də, o müdhiş gecənin ağrısı nə yaddaşlardan silinib, nə də ürəklərdəki izini itirib. Xocalı artıq təkcə bir yaşayış məntəqəsinin adı deyil. Xocalı həm də milli yaddaşımız, qan yaddaşımız, ədalətə çağırışımızdır. O, keçmişimizi unutmağa qoymayan, bizi birliyə və mübarizəyə səsləyən əbədi bir simvoldur.
Bu səbəbdən Xocalıya ədalət məsələsi hər zaman gündəmdə saxlanılmalı, dünya ictimaiyyətinə daim çatdırılmalı və gələcək nəsillərə aşılanmalıdır. Gənclərimiz bu faciənin həqiqətlərini bilməli, tariximizi unutmamalı və milli yaddaşımızı qorumalıdır. Xocalıya ədalət təkcə bir şüar deyil — bu, xalqımızın haqq səsinin, ədalətə və insani dəyərlərə sadiqliyinin ifadəsidir.
Bəhruz Məmmədzadə
“Xüsusi təyinatlıların qaziləri, şəhid ailələri və veteranları” İctimai Birliyinin sədri
Azərbaycan Mətbuat Şurası İdarə Heyətinin üzvü
