“Qazprom”un rəhbəri Aleksey Miller Avropadakı qaz ehtiyatlarının vəziyyətini qısa ifadə ilə şərh edib.
Zefer.media xarici mətbuata istinadən xəbər verir ki, Miller sentyabrın 3-də Şərq İqtisadi Forumu çərçivəsində TASS-a açıqlamasında “Avropada qış olacaq” deyib. Bildirilir ki, o, bu ifadəni yüngül təbəssümlə səsləndirib.
Neft və qaz bazarı üzrə müstəqil ekspert Vladimir Demidov isə Avropada qış aylarında qaz çatışmazlığının qaçılmaz olduğunu bildirib. Onun sözlərinə görə, əsas məsələ çatışmazlığın miqyasının necə olacağıdır.
Ekspert qeyd edib ki, Avropa ciddi qaz çatışmazlığından yalnız Fars körfəzində İran-ABŞ münaqişəsinin həll olunması və Qətərdən qaz tədarükünün artırılması ilə yayına bilər.
“Guardian”ın məlumatına görə, Aİ ölkələrinin qaz anbarlarındakı ehtiyatlar son 13 ilin ən aşağı səviyyəsinə düşüb.
Ekspertlər hesab edirlər ki, qazın anbarlara vurulması indiki templə davam edərsə, Avropa İttifaqı istilik mövsümünə son beş ilin orta göstəricisindən 20 faiz aşağı ehtiyatla daxil olacaq.
Pərvin Hacıyeva
