Rusiya prezidentinin uşaq hüquqları üzrə müvəkkili Mariya Lvova-Belova onu qaçırmaq üçün bir neçə cəhdin hazırlandığını iddia edib.
Zefer.media xarici KİV-lərə istinadən xəbər verir ki, Lvova-Belova bu barədə “Vedomosti”yə müsahibəsində danışıb. Onun sözlərinə görə, Beynəlxalq Cinayət Məhkəməsinin onun barəsində həbs qərarı çıxarmasından sonra Rusiyanın müxtəlif bölgələrində onu qaçırmağa yönəlmiş planlar hazırlanıb və bundan sonra ona şəxsi mühafizə ayrılıb.
Lvova-Belova iddia edib ki, məqsəd onu öldürmək deyil, sağ ələ keçirərək Vladimir Putin əleyhinə ifadə verməyə məcbur etmək olub.
“Onlara mən diri lazımam. Tutmaq istəyirlər ki, prezidentə qarşı ifadə verim”, – deyə o bildirib.
Onun sözlərinə görə, hadisələrlə bağlı konkret olaraq kimin və hansı qurumun arxasında dayandığı məlum deyil. Rusiya hüquq-mühafizə orqanlarının isə Lvova-Belovanın qaçırılmasına dair belə cəhdlərin qarşısının alınması barədə açıq məlumat yaymadığı bildirilir.
Qeyd edək ki, Beynəlxalq Cinayət Məhkəməsi 2023-cü il martın 17-də Vladimir Putin və Mariya Lvova-Belova barəsində həbs qərarı çıxarıb. Məhkəmə onları Ukrayna ərazilərindən uşaqların Rusiyaya qanunsuz deportasiyası və köçürülməsi ilə bağlı müharibə cinayətində şübhəli bilib.
Aytən Yalçınqızı
