Təl-Əviv Livanın paytaxtı Beyrutda İsrail Müdafiə Qüvvələrinin (İMQ) əməliyyatlarını genişləndirmək üçün Vaşinqtonun təsdiqini istəyir .
Zefer.media xəbər verir ki, bu barədə “The Jerusalem Post” məlumat yayıb.
Nəşr bildirib: “İsrailin yüksək vəzifəli rəsmiləri ABŞ-lı həmkarlarından İsrail Müdafiə Qüvvələrinin Beyruta hücumlarını genişləndirməsinə icazə vermələrini istəyiblər”.
Bu arada, “Axios”-un jurnalisti Barak Ravidin X sosial şəbəkəsində Amerika rəsmisinə istinadən verdiyi məlumata görə, ABŞ dövlət katibi Marko Rubio son 48 saat ərzində Livan prezidenti Cozef Aun və İsrailin baş naziri Netanyahu ilə yeni atəşkəs təşəbbüsü irəli sürmək üçün danışıb.
ABŞ İsrail və Livana yeni atəşkəs təşəbbüsü təklif edib. İlk addım olaraq, Hizbullahın İsrailə qarşı bütün hücumları dayandırmasını təklif edir. Bunun müqabilində İsrail Beyrutda münaqişəni qızışdırmaqdan çəkinəcək.
Xatırladaq ki, 31 may tarixində İsrailin Baş naziri Benyamin Netanyahu İsrail Müdafiə Qüvvələrinin Livandakı əməliyyatlarını genişləndirəcəyini açıqladı. O, hərbi kampaniyanın daha uzun çəkəcəyini, lakin İsrailin şimalda təhlükəsizliyi bərpa edəcəyini söylədi.
Zərintac Mayisqızı
