Azərbaycan Prezidenti İlham Əliyev Pakistanın Baş Naziri Şahbaz Şərifə 23 Mart – Pakistan Günü münasibətilə təbrik məktubu göndərib.
Zefer.media məktubda deyilənləri təqdim edir :
“Öz adımdan və Azərbaycan xalqı adından Sizə və qardaş Pakistan xalqına 23 Mart – Pakistan Günü münasibətilə ən səmimi təbriklərimi və xoş arzularımı çatdırmaqdan məmnunluq duyuram.
Bu gün Azərbaycan-Pakistan münasibətləri, dərin tarixi köklərə və ortaq dini-mənəvi dəyərlərə malik qardaş xalqlarımızın iradəsindən qaynaqlanaraq, yüksək səviyyədədir. Yüksək səviyyəli qarşılıqlı səfərlərimiz, sıx əlaqələrimiz, aktiv dialoqumuz dövlətlərarası münasibətlərin bütün sahələrdə möhkəmlənməsinə, ikitərəfli və çoxtərəfli əsaslarda yeni əməkdaşlıq imkanlarının reallaşdırılmasına mühüm təkan verir. Bu kontekstdə keçən il ölkəmizə etdiyiniz səfərləri xüsusi qeyd etmək istərdim.
Azərbaycan və Pakistan arasında münasibətlər çoxtərəfli əməkdaşlıq gündəliyinə malikdir. Ölkələrimizin siyasi, iqtisadi, ticarət, sənaye, energetika, nəqliyyat-logistika, müdafiə, investisiya, humanitar və digər sahələrdə qarşılıqlı faydalı əməkdaşlığı hər gün yeni məzmunla zənginləşir. Bir müddət əvvəl İslamabadda ilk ASAN xidmət mərkəzinin açılması genişmiqyaslı dövlətlərarası əməkdaşlığımızın yeni praktiki nəticəsidir. İkitərəfli əməkdaşlıq əsasında qısa müddət ərzində əldə etdiyimiz uğurlar xalqlarımızın rifahına və firavanlığına, bölgəmizdə əməkdaşlığa xidmət edir.
Azərbaycan və Pakistan arasında qarşılıqlı etimad və dəstəyə əsaslanan əməkdaşlıq çoxtərəfli müstəvidə də uğurla davam edir. Regional və qlobal məsələlərə dair ortaq baxışlarımız, beynəlxalq təşkilatlar çərçivəsində qarşılıqlı dəstək Azərbaycan-Pakistan qardaşlığının və həmrəyliyinin bariz nümunələridir.
Siz tərəfindən dövlətlərarası münasibətlərin və strateji tərəfdaşlığın daha da möhkəmləndirilməsi naminə daim nümayiş etdirilən qətiyyət və əzmkarlığı yüksək qiymətləndirirəm.
Əminəm ki, qardaş ölkələrimiz arasında formalaşmış Azərbaycan-Pakistan strateji tərəfdaşlığı, xalqlarımızın ortaq maraqlarına tam cavab verən, qarşılıqlı qətiyyətli səylərimiz sayəsində bundan sonra da möhkəmlənəcək və dərinləşəcək”.
