Yəməndə İranın dəstəklədiyi husilərin Qırmızı dənizdə Səudiyyə Ərəbistanına qarşı dəniz blokadası tətbiq edəcəyi ilə bağlı bəyanatı ABŞ üçün yeni təhlükəsizlik riski yaradıb.
Zefer.media Reuters – ə istinadən xəbər verir ki, husilər Səudiyyə limanlarında gəmilərin yüklənməsi və boşaldılmasına imkan verməyəcəklərini açıqlayıblar. Ekspertlər hesab edirlər ki, bu addım qlobal neft tədarükünə ciddi təsir göstərə və ABŞ-ın Yaxın Şərqdəki hərbi resurslarına əlavə yük yarada bilər.
ABŞ Prezidenti Donald Tramp isə Qırmızı dənizdə gəmiçiliyin qarşısının alınacağı təqdirdə Vaşinqtonun məsələyə müdaxilə edə biləcəyini bildirib.
“Əgər belə bir şey baş verərsə, biz bununla məşğul olacağıq. Biz bunu əvvəllər də husilərlə etmişik”, – deyə Tramp vurğulayıb.
Pentaqonun keçmiş rəsmiləri bildirirlər ki, husilərə qarşı mümkün yeni əməliyyat ABŞ-ın İranla davam edən qarşıdurması fonunda ordunun resurslarını daha da bölə bilər. Onların fikrincə, ikinci cəbhənin açılması ABŞ-ın həm hərbi qüvvələrinə, həm də hava hücumundan müdafiə sistemlərinə əlavə təzyiq göstərəcək.
Qəmər Kazımzadə
