Azərbaycan şəhidlərinin əziz xanımları ilə Türkiyədə qardaşlıq görüşü keçirilib.
Azərbaycanın müstəqilliyi və ərazi bütövlüyü uğrunda mübarizə apararaq şəhidlik zirvəsinə ucalan qəhrəmanlarımızın əziz xanımları ilə Türkiyədə keçirilən “Türkiyə Qardaşlıq Görüşü” çərçivəsində bir araya gəldik.
Görüş zamanı Azərbaycan və Türkiyə arasında mövcud olan tarixi, mənəvi və qardaşlıq bağlarının əhəmiyyəti vurğulanıb. Türkiyədən olan qardaşlarımızın Azərbaycandan gələn qonaqları öz ailə üzvləri kimi qəbul etməsi iki ölkə xalqları arasındakı sarsılmaz həmrəyliyin və qarşılıqlı ehtiramın daha bir ifadəsi kimi dəyərləndirilib.
“Bir millət, iki dövlət” şüarı ətrafında formalaşan bu möhkəm mənəvi bağların gələcək nəsillərə də ötürülməsinin vacibliyi qeyd olunub. Azərbaycan və Türkiyə arasında qardaşlıq münasibətlərinin yalnız dövlətlərarası əlaqələrlə məhdudlaşmadığı, xalqlarımızı birləşdirən dərin tarixi və mənəvi dəyərlərə söykəndiyi bildirilib.
Görüşdə Azərbaycanın müstəqilliyi və torpaqlarımızın müdafiəsi uğrunda canından keçən şəhidlərimizin əziz xatirəsi ehtiramla yad edilib. Qəhrəmanlarımızın fədakarlığının heç vaxt unudulmayacağı vurğulanıb.
Şəhidlərimizə Allahdan rəhmət diləyir, onların ailələrinə dərin ehtiramımızı bildiririk. Azərbaycan–Türkiyə qardaşlığının, qarşılıqlı həmrəyliyin və sarsılmaz könül bağlarının əbədi davam etməsi arzulanıb.
