Opera müğənnisi Azər Rzazadə də Azərbaycan Dövlət Akademik Opera və Balet teatrı ilə bağlı paylaşım edib.
Zefer.media xəbər verir ki, o paylaşımında bildirib:
“Heç vaxt ağlıma da gəlməzdi ki, həmişə mənə tamaşalardan, oxuduğum ifalardan, yaradıcılığımdan paylaşımlar etdirən teatr, bir gün mənə instaqramda vəkil axtarmağı da məcbur edəcək. Qismət də bu da varmış, amma dəyər, teatr və mədəniyyət naminə dəyər!”.
Müğənni növbəti yazısında isə Mədəniyyət Nazirliyinə dəvət olunduğunu vurğulayıb və quruma minnətdarlıq edib. Lakin o problemin nə olduğunu paylaşımında yazmayıb.
Məlumat üçün deyək ki, Xalq artisti Əvəz Abdullayev teatrın direktoru Yusif Eyvazovun onu və Xalq artisti yalçın Adıgözəlovu işdən çıxardığını iddia edib. Həmin teatrda bir neçə gündür bu cür qarşıdurma xarakterli müzakirələr davam edir.
Zaman-zaman bəzi teatrlarda belə neqativ halların şahidi oluruq. Keçən il də Akademik Dövlət Milli Dram Teatrında qalmaqal yaşanırdı. Əsasən Əməkdar artist Mehriban Xanlarova teatrın bədii rəhbəri Mehriban Ələkbərzadə ilə problemlər yaşayırdı.
Zərintac Mayisqızı
